சீனாவின் அதிநவீன சாலை எப்படி இருக்கு தெரியுமா ? All about China’s solar highway in Tamil

உலகம் நவீனத்தை நோக்கி நகர்ந்துகொண்டு இருக்கின்றது . அதன் ஒரு பகுதியாக போக்குவரத்து துறையில் பல கண்டுபிடிப்புகள் நடந்துகொண்டு இருக்கின்றன . அதிகப்படியான நிறுவனங்களின் முயற்சியே ஓட்டுநர் இல்லாமல் தானே ஓடக்கூடிய வாகனங்களை வடிவமைப்பதுதான் . பல நல்ல முன்னேற்றங்கள் நடப்பதனால் இன்னும் சில ஆண்டுகளில் ஓட்டுநர் இல்லாமல் ஓடக்கூடிய வாகனங்கள் சாலையில் பயணிக்கும் .

அப்படி இயங்கக்கூடிய கார்களுக்கு தேவையான தகவல்களை தருமாறும்  சூரிய சக்தியிலிருந்து மின்சாரத்தை தயாரித்து சாலையில் ஓடக்கூடிய தானியங்கி வாகனங்களுக்கு வாகனத்தை நிறுத்தாமலே சார்ஜ் செய்யும் வகையில் ஒரு சாலை அமைந்தால் எப்படி இருக்கும் ?

அப்படிப்பட்ட அதிநவீன சாலை சீனாவில் அமைக்கபட்டுள்ளது . அது செயல்படும் விதம் , அதனால் கிடைக்கப்போகும் நன்மைகள் குறித்து தான் பார்க்க இருக்கிறோம் .

தற்போதைய நிலவரப்படி உலகின் மேம்படுத்தப்பட்ட அதிநவீன சாலையாக இந்த சாலை இருக்கின்றது . சூரிய சக்தியிலிருந்து மின்சாரம் தயாரிக்கும் வசதி , சாலையில் செல்லும் பேட்டரி கார்களுக்கு மின்சாரம் செலுத்தும் வசதி , சாலை நெரிசல் குறித்த தகவல்களை துல்லியமாக அறியக்கூடிய வசதி என பல சிறப்பம்சங்களை கொண்டிருக்கின்றது .

ஒரு கிலோ மீட்டர் நீளமுள்ள இந்த சாலை சீனாவின் ஜினான் (Jinan) நகரில் அமைக்கப்பட்டுள்ளது . இந்த சாலையில் 45 ஆயிரத்திற்கும் அதிகமான வாகனங்கள் செல்கின்றன . சாலை விளக்குகளுக்கு தேவையான மின்சாரம் , 800 வீடுகளுக்கு தேவையான மின்சாரத்தை தயாரிக்க கூடிய அளவிற்கு சோலார் பேனல் (Solar Panels ) பதிக்கப்பட்டு  இருக்கின்றது .

இந்த சாலையை வடிவமைத்த நிறுவனத்தினர் கூறும்போது ” தற்போதைய நிலவரப்படி 2030 க்கு உள்ளாக தானியங்கி வாகனங்களின்  பயன்பாடு அதிகரித்துவிடும் , ஆகவே அதற்கு ஏற்றவாறு சாலைகளை அமைக்கவேண்டியது இருக்கும் . இயந்திரங்களுக்கு வாகன நெரிசல் குறித்தும் , mapping குறித்தும் , தானே சார்ஜ் செய்து கொள்வதற்கும் வசதிகள் இருக்கின்றன .

இந்த வசதிகள் கொண்ட சாலைகளை தற்போதய அதிபர் ஜின்பிங் இன் சீனா 2025 திட்டத்தோடு இணைத்தே பார்க்கின்றோம் . இதன் மூலமாக வெறும் பொம்மை , மின்பொருள்கள் ஏற்றுமதியாளராக மட்டுமே இல்லாமல் பொறியியல் வல்லுநராக சீனா நிலை நிறுத்தப்படும்  .

 

சூரிய ஒளியால் உட்புகுந்த செல்லக்கூடிய தடிமனான பொருளுக்கு அடியில் சூரிய மின்தகடுகள் படிக்கப்பட்டு இருக்கின்றன . இவை சூரிய சக்தியை சேகரிக்கின்றன .

மேற்புறத்தில் இருக்கக்கூடிய பகுதிகளில் சென்சார்களை பொருத்துவதற்கான வசதிகள் இருக்கின்றன . அவற்றின் உதவியினால் வெப்பநிலை , வாகன  நெரிசல் , வாகனங்கள் செல்லும்போது ஏற்படுகிற அழுத்தம் என பல தகவல்களை கண்காணித்து அனுப்பிட முடியும் . வருங்கால தானியங்கி கார்கள் இந்த தகவல்களை வைத்துக்கொண்டு முடிவுகளை எடுக்க முடியும் .

மேலும் இந்த சாலையின் மூலமாக தயாரிக்கப்படும்  மின்சாரத்தை அவ்வழியே செல்லும் வாகனங்களால் நிறுத்திடாமல் கூட பெற முடியும் .

வெறும் ஒரு கிலோமீட்டர் அளவுள்ள இந்த அதிநவீன சாலையை வடிவமைக்க  6.5 மில்லியன் டாலர் செலவிடப்பட்டுள்ளது .

நினைவில் கொள்ள வேண்டும் , முதல்முறையாக ஒரு திட்டத்தை நிறைவேற்றுகிறபோது அதற்கான செலவு அதிகமாக இருக்கத்தான் செய்யும் . அதனை சீன அரசும் கட்டமான நிறுவனமும் உணர்ந்தே இருக்கின்றன .

கடந்த பத்து ஆண்டுகளுக்கும் முன்னதாகவே இந்த ஆய்வுகள்  தொடங்கியதாக தெரிவித்துள்ள நிறுவனம் , ஏற்கனவே அமைக்கப்பட்டிருந்த சாலையில் மாற்றங்களை செய்ய 55 நாட்கள் ஆனதாக தெரிவித்துள்ளது .

 

உலகப்பொருளாதாரத்தில் முன்னிலை வகிக்க கூடிய நாடுகளில் ஒன்றான சீனா 2030 ஆண்டில் கண்டுபிடிக்கப்பட இருக்கின்ற தானியங்கி வாகனங்களுக்கு ஏற்றவாறு சாலைகளை அமைக்க முயற்சி செய்கின்றது . இந்தியாவில் அதற்கான முயற்சிகள் நடப்பதாக தெரியவில்லை .

ஒருவேளை அதற்கான முயற்சிகள் நடக்கவில்லையெனில் இன்றே நமது அரசாங்கம் அதனை செய்திட வேண்டும் . எதனையும் செய்யும் திறன் நம்மிடம் இருக்கின்றது , அதனை பயன்படுத்திக்கொண்டு முயன்றால் நாமும் வளர்ச்சி அடையலாம் .

பாமரன் கருத்து