ஞானக்கூத்தன் கவிதைகள்

பட்டிப் பூ

தையற்காரன் புறக்கணித்த — புது

வெள்ளைத் துணியின் குப்பைகள்போல்

பட்டிப் பூவின் வெண்சாதி — அதைப்

பார்த்தால் மனசு நெக்குவிடும்

காய்ச்சல் நீங்கிக் கண்விழிக்கும் — ஒரு

கன்னிப் பெண்ணின் முதல் சிரிப்பாய்

பட்டிப் பூவின் கருநீலம் — அந்தப்

படுகை எங்கும் மிகவாகும்

எங்கும் வளரும் பட்டிப்பூ — தன்

குடும்பத் தோடும் சூழ்ந்திருக்கும்

செவியின் மீதில் ரோமம் போல் — அது

தனித்தும் வளரும் இப்போது

முலைகள் அசையத் தான் அசையும் — ஒரு

புடவைத் தலைப்பை நினைவூட்டிப்

பட்டிப் பூக்கள் குலை அசையும் — அதன்

பக்கம் எங்கும் புல்பூமி

நாளை மறுநாள் ரயிலேறி — என்

வீட்டை அடைந்து பைவீசி

படுகைப் பக்கம் நான்போவேன் — என்

பட்டிப் பூவைப் பார்த்துவர