ஊடகங்கள் நமக்கு எதுவுமே செய்திடவில்லை என சொல்வதனைவிடவும் மேலான பொய் ஒன்று இருக்கவே முடியாது. நிர்வாகம் எனும் வட்டத்திற்குள் நேர்மையாக செயலாற்றிட வேண்டும் என நினைக்கும் பல ஊடகவியலாளர்களின் தன்னிகரற்ற செயலையும் அல்லவா நாம் கொச்சை படுத்துகிறோம்
https://youtu.be/9A4grqQhF24
#தமிழ்நாட்டுவேசிஊடகங்கள் என்ற ஹேஷ்டாக் ட்விட்டரில் முன்னனியில் இருந்துவருகின்றது . இதற்கு மிக முக்கிய காரணம் , நடிகர் சங்க தேர்தலை முக்கிய நிகழ்வுபோல கருதி செய்திகளை நேரலையில் உடனுக்குடன் வழங்கிவந்தனர் முன்னனி தொலைக்காட்சிகள் . பெரும்பாலான இடங்களில் தண்ணீர் பிரச்சனை தலைவிரித்தாடுகின்றது , பொதுமக்களே நீர்நிலைகளை சுத்தப்படுத்திட களமிறங்கி இருக்கிறார்கள் , இதுபோன்ற நிகழ்வுகளை மக்களின் கவனத்திற்கு கொண்டு சேர்க்காமல் நடிகர் நடிகைகளை காட்டிக்கொண்டு இருக்கிறார்களே என்ற ஆதங்கத்தினால் தான் இப்படிப்பட்ட ஹேஷ்டாக் உருவாகியது . இந்த கோவத்தினை நம்மால் புரிந்துகொள்ள முடிகின்றது .
இந்தப்பதிவு ஊடகங்களுக்கு வக்காலத்து வாங்குகின்ற பதிவு அல்ல ,ஊடகங்களை குற்றம் சொல்லிட்டு நாம் என்ன செய்துகொண்டு இருக்கின்றோம் என நம்மிடம் இருக்கின்ற குறைகளை சுட்டிக்காட்டுகிற பதிவுதான் இது .
வேசி என்ற வார்த்தை பிரயோகம் தவறானது
தற்போதைய நிலவரப்படி 32 ஆயிரம் ட்விட்டுகள் #தமிழ்நாட்டுவேசிஊடகங்கள் என்ற ஹேஷ்டாக்கில் போடப்பட்டுள்ளன . இதில் எத்தனைபேர் திரும்ப திரும்ப பல ட்விட்டுகளை போட்டார்களோ என தெரியவில்லை . கூட்டிக்கழித்து பார்த்தால் அதிகபட்சமாக 20 ஆயிரம் பேர் இதற்கு எதிர்ப்பு தெரிவிக்கின்றார்கள் என வைத்துக்கொள்வோம் . அவர்களுக்கு எனது பாராட்டுக்கள் .
பிறர் முதுகில் அழுக்காக இருக்கின்றது என்ற குறையை கூறுவதற்கு முன்னதாக நம் முதுகிலே அழுக்கு இருக்கிறதா என பார்த்துக்கொள்வது நல்லதென நினைக்கின்றேன் .
பிகில் திரைப்படத்தின் போஸ்டர் ரிலீஸ் ஆனது அனைவரும் அறிந்ததே . அதனை எத்தனைபேர் பகிர்ந்தோம் , ட்விட்டரில் டிரெண்ட் ஆக்கினோம் . போட்டிக்காக இன்னொரு ஹேஸ்டேக்கை உருவாக்கி அதனை எப்படி டிரெண்ட் செய்தோம் . பிக்பாஸில் யாரெல்லாம் போட்டியாளர்கள் என எத்தனைபேர் தேடி தேடி படித்தோம் , பார்த்தோம் . எத்தனை பேர் இப்போதே பிக்பாஸ் பார்ப்பதற்காக அட்டவணைகளை போட்டுவிட்டோம் .
கிட்டத்தட்ட தமிழகத்தின் பெரும்பான்மையான இளைஞர்களும் மக்களும் செய்தவை இவைதானே . இதனை எவராலும் மறுக்க முடியுமா ? வறட்சியால் பாதிக்கப்பட்டு கிடக்கின்ற நாமே இப்படி பொறுப்பற்ற தன்மையில்தானே செயல்பட்டுவருகிறோம் , ஆனால் பணம் சம்பாதிப்பதற்காகவே தொலைக்காட்சிகளை நடத்துபவர்களை நமக்காக குரல் கொடுக்கவேண்டும் என வற்புறுத்துவதில் என்ன அர்த்தமிருக்கிறது ?
அவர்களை வேசி என சொன்னால் நம்மை என்ன சொல்லி திட்டிக்கொள்ளப்போகிறோம் ?
சிந்திப்போம் !
எழுதுவது எனக்கு பிடித்தமான செயல். சமூகத்தில் நடக்கின்ற நிகழ்வுகளின் மீதான என்னுடைய பார்வையையும் புரிதலையும் என் மக்களோடு என் மொழியில் பகிர வேண்டும் என்ற ஆவலால் உருவானதே இந்த இணையதளம். உங்களுடைய ஆதரவு கிட்டும் என நம்புகிறேன்! தமிழ் வாழ்க!